inuunerinneq

SINNARLUNNERIT, ANGSTERNERIT, STRESSERNERIT,

IMMINULLU ANNIKIGINERIT TAMAANI IPERAKKIT

Seqineq pikkorissarneq

Qulequttat ukua sammisaralugit ineriartorusuppit?

🌱 Imminut tusarnaarsinnaaneq.

🌱 Imminut asaneq.

🌱 Imminut naammagineq.

Seqineq Wellness Studio

Seqineq Wellness Studio

Inooriaaseq + Nerisassat

Oqaaseqaatit

"Uummammik pisumik qujamasuutigeqaara Lea Holm - Seqineq oqaloqatigisalersimagakku. Suli oqaloqatigisarnerani inuttut ineriartorujussuarnerma qanoq ersaritsiginera takuara. ✨Qujamasoqaanga inoqarmat Leamik. Inunnguaq suliaminut tunniusimanermigut sullitami sikkernissaanik aqqutissiuussisoq. Oqanngisaannarpoq imaaliorit, oqaatsilli atortagaani oqaaseq uannut sunniinerpaaq tassaavoq: pimoorukkukku allanngorumaarputit. 🌱 Oqaloqatigisalerakku inuttut inissisimaffinni inuuneq qaammaqqissinnaanngitsutut nuannaaleqqissinnaanngitsutullu eqqarsartarpunga. Avatangiisinni pisut aallaavigalugit imminut qanoritsissanerlunga aaqqissuuttarsimallunga paasiartulerakku, peqqinnartumik imminut atassuteqarfiginissannik aqqutissiuullunga suliassittalermanga apeqqusernikuuara. Aamma kingorna inuttaanut oqaatiginikuuara iluaalliorsimallunga. Sunaaffa allanngorneq taamatut misigineqartarsimavoq. Sungiusimanikuunnginnakku imminut atassuteqarfigineq soorunami nalunaqqaarmat nutaajummallu toqqissisimanarinngeqqaarnikuuara. Piffissap sivisuup kisianni eqqarsaatigalugu "annikittup" iluani inuttut ineriartorujussuarsinnaanerma kinguneraa aliasunneq, kamanneq misigissutsillu kamaap aliasunnerullu "ilaqutai" suli atortaraluarlugit tikilluaqqusinnaalerneri. Sulimi nuannaartarlungalu aliasuttarpunga kamattarlungalu. Kisianni inissaqartitsisalerama, uippallertarunnaarpunga ajornartorsiutaasorisannik aaqqiiniapiloortarunnaarlunga. Paasisara unaavoq, takkuttarput aamma peeqqittarput. Oqik🌿 Aappaattut, iluaqutiginerpaasara tassaavoq Leap oqaloqatigiinnerput killiffiga aallaavigalugu suliassannik imaluunniit atorsinnaasannik sakkussannik nassittarmanga. Taannaavoq killiffimmiit killiffimmut nikeriartarnera, utersaalaariarlungalu nukittuninngorlunga alloriaqqissinnaalertarnera. Nassiussaalu piumaguma uterfigeqqissinnajuaannarakkit. ❤️ Imminut peqqinnartumik atassuteqarfigisinnaalernera tunissutaavoq uannut. Taannalu avatangiisinniit aamma malugineqarsinnaavoq. Sapersorisakka, killilersuutikka amerlasuut peerpakka - sunaaffa angusinnaasakka eqqarsartaatsima allanngortikkiartuaaneratigut suulluunniit kissaatikka piviusunngortissinnaallugit. Imminut piumaffigineq nukiusoq timitarsivara. Minnerunngittumik peqqinnanngittut suulluunniit killilersinnaaleriartorpakka. Ilaqutariinnermik pilersitseqatigisimasannik annaasaqarninni, imminut nutaamik ilinniaqqittussanngorninni nakkangarujussuarneq qaangertussaanngittutut misiginikuusara qaangersinnaallugu paasigakku eqqarsarpunga taama sakkortutigisumik aqqusaagaqarsinnaaguma, nuannaarneq qaamanerlu misigeqqissinnaalernikuugakkit taava sunaluunniit qaangersinnaavara. ❤️ Lea - QUJANAQ, suliarni inuttullu angusaqarluarlutit ingerlalluarnissarnik kissaappakkit.

— Simigaq.

“Qujanaq inuiaqatigiinnut kalaallinut aqqutissiuisuugavit - qularinngilluinnarpara kisima taamak eqqarsarnanga pisariaqartikkatsigu eqqarsartaatsitigut inuttullu nukittuutut inissisimalernissarput ersigata saperata ✨ Inuttut ineriartorujussuarnera nuannaarutigeqaara. Ukiut tallimat qaangiussimalerput oqaqqaarama atornerlugaanikuullunga, taamanilu kammalaatit ilaquttallu soorunami aalassassimaaqaat. Uangali nakkaannarusussimanngilanga oqartuarlunga “ajornavianngilaq qaangiukkumaarpoq imminut ajugaagaaffigissaanga, nalunngilara kisima tamanna aqqusaarnikuunagu, inuusuttoqatinnut kalaallinullu takutissavara qanorluunniit aqqusaagaqarsimatigigaluaraanni ajunngitsumik inuuneqartoqarsinnaasoq”. Oqaatsilluunniit tamakkua puujoraluarpakka imminut ineriartortillunga pinissama tungaanut. Ullumikkut angusara nuannaarutigeqaara sunaaffa taamak inuuneq oqinnerulluni ingerlasinnaavoq 🥹✨ Inuuneq nammineq takorloortuarsimasara misigisaniik pituttorsimagani inuuneq ❣️ QUJANAQ ✨”

— Kristina.

“Aluunnguaq Oqaloqatinginnittarnerit ingerlatereernerini misingisartakkakka tupinnartuupput. Aallartikkatta imminut ilisimaaralunga oqartarpunga. Eqqarsaatimali taama isumaqartissimangunaannaavaannga, isumaqaraluaramami taamaattoq. Oqaloqatingiittarnitsinnili misingisalerpara timikkut, tarnikkut, anersaakkullu ataasiunera, piviusumillu imminut ilisimaariartornera tassanngaanniit aallartippoq. Timinni timima sulinera tusarnaarsinnaanngorlungu allaat. Eqqarsaataannakkuunngittoq, misinginerisingulli. Tassani aattaavissuaq  “imminut atassuteqarfingilluarneq” misingisalerpara . Imminut takusinnaalerpunga - Imminut tusarnaarsinnaalerpunga -Killilersuutingisartakkakka takulerpakka - Imminut asaneq paasivara - Imminut pingaartinneq paasivara - Naleqassusera takuara - Timera tusarnaarsinnaalerpara. Aqqutaa tamaaviat tamaat piareersimajuaannarnerit qujamasuutingeqaara. Sumilluunnit saaffingisinnaanikuuakkit, Sukkulluunniillu saaffinginniffinni akissutissaqartuaannavinnikuunerit qujamasuutingeqaara. Oqaloqatingiittarnitsinni misingisimajuaannarnikuuvunga qitiullunga, tamarpillu imminut tunniullutit aqqutissiuussisarnitit nalitoqaat. Kalaaliuvutit inoqatinnut kikkuungaluanut imminut tunniullutit ilumoorullungulu sullisserusuttoq. Qujanaq aqqutissiuussinernut nalituumut. Siunissami ajunnginnerpaamik kissaappakkit”.

— N.B

Hej Lea, qujanaq. Qujanaq ukioq ataaseq qaangiummat piffissaqarfigalunga sakkussannik tunioraramma. Paasivara imminut isumakkeerfigeqqusaallunga, imminut asaqqusaasunga, imminut ataqqisinnaasunga. Paasivara ullut tamaaviisa imminut asaneq ilinniagassaasoq. Paasivara killiliisinnaallunga inunnullu allanut nalimmassartariaqanngitsunga. Paasivara nakkaqqaguma imminut qanoq qaqiseqqissinnaanerlunga. Paasivara nipeq nakkarsaasoq namminiusoq, aqunneqarsinnaasorlu inuuninnut sunniinera annikillisikkumallugu, tamannalu sungiusagassaasoq. Paasivara nammineerlunga aamma sakkussanik ujarlersinnaasunga. Siornatigut ulluinnarsiutigisimavara imminut peqqinnanngitsumik oqaluuttarneq, oqarsinnaanngilanga nipi taanna nipaarunnikuusoq, kisianni nipi taanna mumisissinnaalernikuuara ajunngitsunut saatsisinnaalersimallugu. Aqqut taanna ajornanngitsuunngilaq, soorlu illit oqarnittuut ullut tamaaviisa sungiusagassaasoq imminut piffissaqarfiginermi imminullu naalaarnermi. Sakkussat imminut asanerulernermi aammalu imminut naalaarnerulernermi tunniussimasatit uku ullut tamangajaasa aallunniartalernikuuakka: Qujamasuutikka pingasut allattaavinnut allattorlugit. Nerisassat inuussutissartaqarluartut peqqinnartut nerinissaat. Minnerpaamik 5 min. mediterernissaq. Oqaaseqatigiit ”uanga naammappunga” paasillugit upperalugillu qarasannut tarninnullu pulasisinnaalernissaat. Taakkuinnaanngillalli, sakkussanik amerlasuunik ullumikkut inuuninnut sunniingaatsiartunik aqqutissinuunnikuuarma, qularinngilaralu inuunerma sinnera atorluarumaarlugit. Lea qujanaq illiugavit, pikkoreqaatit neriuppungalu qaamanerit malillugu taamatut nuannersumik inuunermilu allannguingaatsiartumik sunniisarnerit aallutiinnassagit.

— naja Parnuuna.

Lea qujanarujussuaq inoqaternut ikiuerusullutit imminut nittarsaakkavit, qujanaq ujaramma qujanarlu nassaarigakkit. Arnarpassuit ilittut ittumik atorfissaqartitsipput. Inuunermi sakkussat pingaarutillit tunniussuukkakkit qujanaq, qujanaq inuuninni nakkaqqanerpaasunga qaqiniarninni nukinnik inuunermi sakkussanik tunniussuigavit. Imminut pingaartinnermik, imminut paarilluarnermik, killiliinermik, inuunerlu nuannersoq nammineq nassaarinissaanik. Qujanaq inuuneq nuannarisarput nammineq ilusilersoqqullugu qaammarsaajuaravit. Massakkut nukissaqarneroqaanga, uumap ingerlanerani angusaqartutut assut misigisimavunga, qilanaarlunga siunissaq nammineq ilusilersornissaanut. Inuuneq ingerlammat nakkarfissaqartarmallu, nalunngilara uunga peqqissangaluaruma saaffissaralutit. Maqaasinassaqaatit qanorli taamannaannaq. Qujanarujussuaq sulinerit pingaartillugu arnarpassuit ikorfartorlugillu aqqutissiuukkakkit.

— Mia.

“Hej Lea. Inuttut killiffiga iluarisimaartuarsinnarpara imminullu tanngassimaarutigivunga assut. Qujamasukkama aamma inuttut killiffiga killiffiginngisaannarsimasutut misigigakku ilinnut apuukkusunnermik unnersiorfigilaarpakkit ilinninngaanniit pissarsiaqarfigigakku. Imminut tatiginera naleqartinneralu sivisoorujussuarmik misiginikuunngilakka aamma allaniik allaanerullunga annikinnerullungalu misigiuaannarnikuuvunga, sunut tamangajannullu ajukkuttarlunga (sussaguma kisiat tassa ilalersoqqaarlunga) toqqissisimallunga kisima pisussinnaananga aqqusinikkut. Anaanarutiaarnikuuvunga, peerunnera akuerinikuunerartarlugu ukiut tamaasa periodeqartarpunga deprassionerlunga imminut nalligalunga ataataga nalligalugu aamma kamaattaqaara imerajuttuummat suararpassuarnik uannut peqqinnanngitsumik immersulertarlunga aammalu weekendit tamaasa imertarlunga ingallunga imminut naleqartinnera tatiginera millisartuarlugu. Massakkut killiffiga oqarsinnaavunga QANGAMITA TAAMAK INUUNERITSIGIGAMA. Kisima fitnessiliartalernikuuvunga allanut naleqqussanngilluinnarlunga, ajukkutinngilluinnarlunga, uannut pillunga fitnessiliartalernikuuvunga pinngitsoorsinnaajunnaarlugulu. Aqqusinikkut eqqissiivillunga pisorujoorsinnaanngornikuuvunga imminut tatigeqqissaarlunga iluarisimaarluinnarlunga, saniatigut suliffigisartagakka nikeralaaramik immikkuullarinnera akueralugu inuit nutaat akornani sungiussiniarsinnaaleqqavunga suli ilinnialaagassarivarali anguniagaqarusunnermik inuunera saakkallaqqavoq aamma angorusutakka angullattaarpakka tulleriaarujoorpakka. Unammillernarivarali inooriaasera allanngorluinnarnerani qanigisakka kammakka ulluinnarinerpaanikuusakka ilai naleqquffigiunnaaqqagakkit peqatiginiarneri soorlu ilagiuminaatsillugit killiffeqatigiunnaaveqqagakkit. Unammillernarporlu ataataga killiffima mumingarluinnaaniituaannarmat kisiat nalunngiinnarpara killiffiga tulluusimaarutigigaa. Meditation sanaatit iluaqutigisaqaakkali toqqissisaataajuaannarput ingammik makeqqammerluni ulloq nutaaq aallartilluarumagaanni. Ullut unammillernartut takkuttuaannarmata piffissanngorsorigukku nangaassutissaqarnanga coachingimut malinnaaqqikkumaarpunga ugguarnanngeqimmat. Oqartarpunga inuuneq ujartugara kiisami inuunerilerlugu. Killiffigisimasara unnersiutigerunnermik atuagassilaarpakkit”.

Elisabeth.