Lea Holm

“Ullaat tamaasa meditationereeraangama imminut aperisarpunga: Uanga ullumikkut suna pisariaqartippara timikkut, tarnikkut, misigissutsikkut eqqarsartariaatsikkullu peqqissuullunga inuussaguma?”.

— Lea

Ullumikkut qujamasuppunga inuugama.

 

Taamaattuaannarsimanngilarli. Imminut naleqartinnanga inuunikuuvunga, imminut asaneq nalusimavara sunaanersoq, imminut upperinngilluinnaqqissaarnikuuvunga, angst inuuninni aqutsisoralugu inuusarnikuuvunga imminullu sequtserneq ulluinnarsiutigalugu inuunikuullunga. Ilaatigut ima ajortigisarnikuuvunga, inuunera kiperusuttarsimallugu qamuuna ilorlikkut anniangaarama.

atornerluisut, imigassaq, inuillu peqqinnanngitsut avatangiiseralugit inuunikuuvunga. Anaanaga 2010-mi annaavara aapparisimasamininngaanniit toqunneqarmat.

Sapinngisara tamaat misisissutsikka toqqorterniarsarisarnikuuakka, imminut kisimeeqatigisinnaananga, ajornartorsiutikkalu qimarratigisaqattaartarlugit. Imminut pilliutigiuarneq allat nuannaarniassammata, peqqinnanngitsumik inooriaaseqarneq, nerisassat peqqinnanngitsut, pujortarneq, imerujussuartarneq, anguniakkat uannut inuttut peqqinnanngitsut ulluinnarsiutigisarnikuuakka.

Kiisa 26-iinnarnik ukioqarlunga naqqanut pivunga.

  • Timikkut, tarnikkullu qasulluinnarlunga anniarlungalu.

  • Ullut ilaanni ullorsuaq naallugu siniffimmi innangarusaarlunga qiarsuaartaartarlunga, qaqeqqinneq sapilertarlunga.

  • Qamuuna annianngaarnera allaat timinnut sunniuteqartalerluni. Anersaartorpiarsinnaajunnaartarlunga, ulloqartarsimallungalu ilaanni timera annernangaamat nikippiarsinnaaneq ajorlunga.

  • Inoorusussuseeruteqqaavillunga.

Qujamasuppunga naqqanut pisimagama.

Naqqanut pisimanngitsuuguma inooriaaseq uannut peqqinnanngitsoq ingerlaterujuuginnarsimassagaluarpara.

Aatsaat naqqanut pigama takulerpara qanoq ajortigisumik imminut pisarsimanerlunga. Imminut asananga, imminut atassuteqarfiginanga, imminut ataqqinanga imminullu naleqartinnanga inuusimavunga.

Upperaara naqqanut pisinneqarsimallunga ‘itersarneqarnissara‘ pisariaqartissimagakku, inuuneq uannut peqqinnartoq nassaariniassagakku.

Aaliangerpunga imminut ikiorniarlunga inuunera peqqinnartumut saatsikkusullugu.

Taamaammat yogami, meditationimi, aammalu mindfulnessimi ilitsersuisutut ilinniarlerpunga, Indiap avannaani himalayami. coachitut ilinniarnikuuvunga, immikkullu nerisassat pillugit aamma ilinniarnikuullunga.

Paasinikuuara

 

  1. Imminut asaneq imminullu naleqartinneq, inuunitsinnut qanoq pingaaruteqartiginersoq.

  2. Annanneqarnaviarnanga, Kisimali akisussaasuullunga inuunera allangortikkusukkukku.

  3. Kisima akisussaasuullunga inuttut peqqissuussaguma.

  4. Inuuneq uannut isumaqarluartoq, nuannersorlu kisima pilersissinnaalugu.

  5. Imminut atassuteqarfigilluarlunga inuusariaqarlunga avataaninngaanniit immersorneqarnissara iperarlugu.

  6. Nammineerlunga eqqarsaatikka aqutassaralugit.

Illimmi?…

 

Imminut asavit? Imminut naleqartippit? Imminut ataqqivit? Imminut naalaarsinnaavit? Ikiorusuppakkit, imminut asaneq, imminut naleqartinneq, imminut ataqqineq, imminut naalaarsinnaaneq aaammalu angst iperarlugu inuulernissanut.

Imaassinnaavq massakkut inissisimaffigisat uanga aamma inissisimaffiginikuugiga, immaqa allatakka ilisarivatit(?) Imminut ikiorsarnikuuvunga inuunera uannullu atassuteqarnera peqqinnartunngortillugu. uannut pitsaanerpaaq peqqinnarnerpaarlu toqqartuaannarpara, uannummi paarilluanngikkuma, uannullu pitsaanerpaaq toqqarneq ajorukku naqqanut peqqittussaagama.

Periarfissat